首页科技娱乐体育干货女人设计时尚旅游美食语录健康

ཚངས་དབྱངས་རྒྱ་མཚོའི་མགུར་གླུ།

2016-12-13 15:10:00来源:20区编辑:转角遇见你

ཚངས་དབྱངས་རྒྱ་མཚོའི་མགུར་གླུ།

ང་ཚོ་ལ་དོ་ཁུར་བྱེད་རྒྱུ་མ་བརྗེད།

    


མུ་འགོད།

༄༅།།རྒྱལ་བ་ཚངས་དབྱངས་རྒྱ་མཚོའི་མགུར་གླུ།





རྒྱལ་བ་སྐུ་ཕྲེང་དྲུག་པ་ཚངས་དབྱངས་རྒྱ་མཚོ་ཚང་།


བུ་མོ་ཨ་མར་མ་སྐྱེས།། ཁམ་བུའི་ཤིང་ལ་སྐྱེས་སམ།།
ཨ་གསར་ཟད་པ་ཁམ་བུའི།། མེ་ཏོག་ལས་ཀྱང་མགྱོགས་པ།།


བུ་མོ་ཆུང་འདྲིས་བྱམས་པ།། སྤྱང་ཀིའི་རིགས་རྒྱུད་མིན་ནམ།།
ཤ་འདྲེས་ལྤགས་འདྲེས་བྱུང་ཡང་།། རི་ལ་ཤོར་གྲབས་མཛད་གིས།།

རྟ་རྒོད་རི་ལ་ཤོར་ཀྱང་།། རྙི་དང་ཞགས་པས་ཟིན་ཆོག།
བྱམས་པས་ངོ་ལོག་བརྒྱབ་པས།། མཐུ་ངོ་ཟིན་པ་མི་འདུག།

བྲག་དང་རླུང་བོ་བསྡེབས་ནས།། རྒོད་པོའི་སྒྲོ་ལ་གཟན་བྱུང་།།
གཡོ་ཅན་རྫུ་བག་ཅན་གྱིས།། ང་ལ་གཟན་པོ་བྱས་བྱུང་།།

སྤྲིན་པ་ཁ་སེར་གཏིང་ནག། སད་དང་སེར་བའི་གཞི་མ།།
བན་དྷེ་སྐྱ་མིན་སེར་མིན།། སངས་རྒྱས་བསྟན་པའི་དགྲ་བོ།།

ས་དེ་ཁ་ཞུ་གཏིང་འཁྱག། རྟ་ཕོ་གཏོང་ས་མ་རེད།།
གསར་འགྲོགས་བྱམས་པའི་ཕྱོགས་སུ།། སྙིང་གཏམ་བཤད་ས་མ་རེད།།

ཚེས་ཆེན་བཅོ་ལྔའི་ཟླ་བ།། ཡིན་ལ་འདྲ་བར་འདུག་སྟེ།།
ཟླ་བའི་དཀྱིལ་གྱི་རི་བོང་།། ཚེ་ཟད་ཚར་ནས་འདུག་གོ།

ཟླ་བ་འདི་ནི་ཕར་འགྲོ།། རྟིང་མའི་ཟླ་བ་ཚུར་ཡོང་།།
བཀྲ་ཤིས་ཟླ་བ་དཀར་པོ།། ཟླ་སྟོད་ཕྱོགས་ལ་མཇལ་ཡོང་།།


དབུས་ཀྱི་རི་རྒྱལ་ལྷུན་པོ།། མ་འགྱུར་བརྟན་པར་བཞུགས་དང་།།
ཉི་མ་ཟླ་བའི་འཁོར་ཕྱོགས།། ནོར་ཡོང་བསམ་པ་མི་འདུག།

ཚེས་གསུམ་ཟླ་བ་དཀར་པོ།། དཀར་དགོས་ནང་ནས་ཆོད་སོང་།།
བཅོ་ལྔའི་ནམ་དང་མཉམ་པའི།། ཞལ་བཞེས་གཅིག་ཡང་གནང་ཞུ།།

ས་བཅུའི་དབྱིངས་སུ་བཞུགས་པའི།། དམ་ཅན་རྡོ་རྗེ་ཆོས་སྐྱོང་།།
མཐུ་དང་ནུས་པ་ཡོད་ན།། བསྟན་པའི་དགྲ་བོ་སྐྲོད་དང་།།

ཁུ་བྱུག་མོན་ནས་ཡོང་བས།། ནམ་ཟླའི་ས་བཅུད་ཕེབས་སོང་།།
ང་དང་བྱམས་པ་འཕྲད་ནས།། ལུས་སེམས་ལྷོད་པོར་ལངས་སོང་།།

མི་རྟག་འཆི་བ་སྙིང་ནས་མ་དྲན་ན།། སྤྱང་གྲུང་འཛོམས་ཀྱང་།།
དོན་ལ་ལྐུགས་པ་འདྲ་བྱུང་།།❶

ཁྱི་དེ་སྟག་ཁྱི་གཟིག་ཁྱི།། གདག་ག་སྟེར་ནས་འདྲིས་སོང་།།
ནང་གི་སྟག་མོ་རིས་འཛོམས།། འདྲིས་ནས་ཐུ་རུ་ལངས་སོང་།།

ཤ་འཇམ་ལུས་པོ་འདྲེས་ཀྱང་།། བྱམས་པའི་གདེང་ཚོད་མི་ལོན།།
ས་ལ་རི་མོ་བྲིས་པས།། ནམ་མཁའི་སྐར་ཚོད་ཐིག་བྱུང་།།

ང་དང་བྱམས་པའི་སྡེབ་ས།། ལྷོ་རོང་མོན་པའི་ནགས་གསེབ།།
སྨྲ་མཁན་ནེ་ཙོ་མ་གཏོགས།། སུ་དང་གང་གིས་མི་ཤེས།།
སྨྲ་མཁན་ནེ་ཙོ་ཨོ་ཤེས།། གསང་ཁ་མདོ་ལ་མ་གནང་།།

ལྷ་ས་མི་ཚོགས་འཐུག་ལ།། འཕྱོངས་རྒྱས་མི་སྤུས་དག་པ།།
ང་ལ་ཡོང་བའི་ཆུང་འདྲིས།། འཕྱོངས་རྒྱས་གཞུང་ལ་ཡོད་དོ།།

ཁྱི་རྒན་རྒྱ་བོ་ཟེར་བ།། རྣམ་ཤེས་མི་ལས་སྤྱང་བ།།
སྲོད་ལ་ལངས་སོང་མ་ཟེར།། ཐོ་རངས་ལོག་བྱུང་མ་ཟེར།།

སྲོད་ལ་བྱམས་པ་བཙལ་བས།། ཐོ་རངས་ཁ་བ་འབབ་བྱུང་།།
གསང་དང་མ་གསང་མི་འདུག། ཞབས་རྗེས་གངས་ལ་བཞག་སོང་།།

པོ་ཏ་ལ་རུ་བཞུགས་དུས།། རིག་འཛིན་ཚངས་དབྱངས་རྒྱ་མཚོ།།
ལྷ་སའི་ཞོལ་དུ་སྡོད་དུས།། འཆལ་པོ་དང་བཟང་དབང་པོ།།

ཤ་འཇམ་ཉལ་སའི་ནང་གི།། སྙིང་ཐུབ་དུང་སེམས་ཅན་མ།།
ཨོ་ལོའི་རྒྱུ་ནོར་འཕྲོག་པའི།། གཡོ་སྒྱུ་བཤད་པ་མིན་འགྲོ།།

དབུ་ཞྭ་དབུ་ལ་བཞེས་སོང་།། དབུ་ལྕང་རྒྱབ་ལ་དབྱུགས་སོང་།།
ག་ལེ་ཕེབས་བྱེད་བྱས་པས།། ག་ལེ་བཞུགས་བྱེད་ཟེར་གིས།།
ཐུགས་སེམས་སྐྱོ་བྱུང་བྱས་པས།། མགྱོགས་པོ་འཕྲད་ཡོང་གསུང་བྱུང་།།

བྱ་དེ་ཁྲུང་ཁྲུང་དཀར་མོ།། གཤོག་རྩེ་ང་ལ་གཡོར་དང་།།
ཐག་རིང་རྒྱང་ལ་མི་འགྲོ།། ལི་ཐང་བསྐོར་ནས་སླེབས་ཡོང་།།

ཤི་དེ་དམྱལ་བའི་ཡུལ་གྱི།། ཆོས་རྒྱལ་ལས་ཀྱི་མེ་ལོང་།།
འདི་ནས་ཁྲིག་ཁྲིག་མི་འདུག། དེ་ནས་ཁྲིག་ཁྲིག་གནང་ཞུ།། ཛ་ཡནྟུ།།

མདའ་མོ་འབེན་ལ་ཕོག་སོང་།། མདེའུ་ས་ལ་འཛུལ་སོང་།།
ཆུང་འདྲིས་བྱམས་པ་འཕྲད་བྱུང་།། སེམས་ཉིད་རྗེས་ལ་འབྲངས་སོང་།།

རྒྱ་གར་ཤར་གྱི་རྨ་བྱ།། ཀོང་ཡུལ་མཐིལ་གྱི་ནེ་ཙོ།།
འཁྲུངས་ས་འཁྲུངས་ཡུལ་མི་གཅིག། འཛོམས་ས་ཆོས་འཁོར་ལྷ་ས།།

མི་ཚོས་ང་ལ་ལབ་པ།། དགོངས་སུ་དག་པ་ཁག་ཐེག།
ཨོ་ལོའི་གོམ་གསུམ་ཕྲ་མོ།། གནས་མོའི་ནང་ལ་ཐལ་སོང་།།

ལྕང་མ་བྱི་འུར་སེམས་ཤོར།། བྱི་འུ་ལྕང་མར་སེམས་ཤོར།།
སེམས་ཤོར་མཐུན་པ་བྱུང་ན།། སྐྱ་ཁྲ་ཧོར་བས་མི་ཐུབ།།

ད་ལྟའི་ཚེ་ཐུང་འདི་ལ།། དེ་ཁ་ཙམ་ཞིག་ཞུས་ནས།།
རྟིང་མའི་བྱིས་པའི་ལོ་ལ།། མཇལ་འཛོམ་ཨེ་ཡོང་བལྟའོ།།

བྱ་དེ་སྨྲ་མཁན་ནེ་ཙོ།། ཁ་རོག་བཞུགས་རོགས་མཛོད་དང་།།
ལྕང་གླིང་ཨ་ལྕེ་འཇོལ་མོ།། གསུང་སྙན་འགྱུར་དགོས་བྱས་བྱུང་།།

རྒྱབ་ཀྱི་ཀླུ་བདུད་བཙན་པོ།། འཇིགས་དང་མ་འཇིགས་མི་འདུག།
མདུན་གྱི་ཀ་ར་ཀུ་ཤུ།། འཐོག་ཏུ་དགོས་པ་བྱས་སོང་།།

དང་པོ་མ་མཐོང་མཆོག་ག། སེམས་པ་ཤོར་དོན་མི་འདུག།
གཉིས་པ་མ་འདྲིས་མཆོག་ག། སེམས་གཅོང་ཞུགས་དོན་མི་འདུག།


རིག་འཛིན་ཚངས་དབྱངས་རྒྱ་མཚོ།། སྙིང་སྡུག་འཚོལ་གྱིས་མ་གསུང་།།
རང་ལ་དགོས་པ་ནང་བཞིན།། མི་ལ་དགོས་ཀྱི་ཡོད་འགྲོ།།

ལྷ་ཤིང་ཤུག་པའི་རྩེ་ལ།། ཁུ་བྱུག་གཞོན་ནུ་བབས་འདུག།
གསུང་སྐད་མང་པོ་མི་དགོས།། སྙན་པོ་ཚིག་གཅིག་གསུངས་དང་།།

བསམ་ཡས་བྱ་ཕོ་དཀར་པོ།། བྱ་སྐད་སྔ་པོ་མ་རྒྱོབ།།
ང་དང་ཆུང་འདྲིས་བྱམས་པ།། སྙིང་གཏམ་ཤོད་འཕྲོས་ལུས་ཡོད།།

ཆང་འདི་དང་པོས་མ་བཟི།། ཆང་འདི་གཉིས་པས་མ་བཟི།།
ཆུང་འདྲིས་བྱམས་པས་ཞུས་པས།། ཞལ་དཀར་གང་གིས་བཟི་སོང་།།

མི་ཚོ་མང་པོའི་དཀྱིལ་དུ།། ང་གཉིས་ཡིན་མདོག་མ་གནང་།།
ཁྱེད་ཀྱི་ཐུགས་ལ་ཡོད་ན།། སྤྱན་གྱིས་གཟིགས་ཕྱོགས་གནང་དང་།།


ཁྱོད་ནི་གསེར་ཟངས་སྐུ་རེད།། ང་ནི་འདག་པའི་ལྷ་རེད།།
ལྷ་ཁང་གཅིག་གི་ནང་དུ།། ང་གཉིས་མཉམ་དུ་མི་ཡོང་།།

སེམས་གཅོང་བྱམས་པས་གཅུག་པའི།། ལུས་པོའི་མདོག་ལ་གཟིགས་དང་།།
ཤ་སྐམ་པགས་སྐམ་བྱས་པར།། ཨེམ་རྗེ་བརྒྱ་ཡིས་མི་ཕན།།

ཤ་ཚ་ཆེ་བའི་དུས་ལ།། སྙིང་གཏམ་ཚང་མ་མ་ཤོད།།
ཁ་གཅིག་སྐོམ་པའི་དུས་ལ།། རྫིང་ཆུ་ཚང་མ་མ་འཐུང་།།
ལས་ལ་འགྱུར་བ་ཡོང་དུས།། འགྱོད་པ་བྱས་ཀྱང་འཕྱིས་ཡོང་།།






མ་ཡིག་ལྟར་དཔྱད་གཞིར་བཀོད་པའོ།

珠峰林卡(gh_b03117cab7f9)

 查看原文